大公網4月30日訊（記者龔學鳴）講起青衣戲棚，大家一定係好鍾意「掃街」，估唔到立法會議員田北辰都鍾意「掃街」添！佢係facebook發帖，話汲取上年食兩三檔就飽肚嘅經驗，所以今次專登搵埋一班同事齊齊去，包括葵青區議員徐曉傑同吳家超。佢哋仲自備餐盒和筷子，可以循環再用，又環保又唔洗搞到一大堆垃圾。
到底阿田有咩推介呢? 講出嚟真係驚人，佢哋居然可以食勻安格斯牛大捲燒、燒雞翼、金奇異果汁、燒元貝、鵝肝多士、燒鰻魚、燒帶子、燒芝士釀蘑菇、蟹黃灌湯包、臭豆腐、燒豬頸肉、咖喱薄餅、蒜蓉爆炒雞軟骨、燒生蠔、芝士玉子燒、砵仔糕、蚵仔煎、椰子汁、炸魚蛋、炸大腸、冰鎮菠蘿仔，最後以材料十足嘅朱古力雞蛋仔。不得不佩服呢！阿田仲話，其實呢類夜市喺香港真係好受歡迎，如果喺各區輪流舉辦就好啦，可以促進地區經濟呀嘛！不過天后誕戲棚去到今日，如果錯過咗，就要等下年啦！
