中上環除咗摩天大廈外，中西合璧、新舊並存嘅獨特面貌一樣咁吸引！旅發局新推出「舊城中環」，按區內歷史建築、藝術文化、美食同時尚生活，結合五條主題漫步遊路線，仲搵嚟三間旅行社合作，推出深度遊導賞團。識玩，當然係跟住本「舊城中環」小冊子捐窿捐罅，有排你打卡！

　　中西合璧 香港獨有

　　五條路線以荷李活道做核心，東至雲咸街起、南至堅道、西至水坑口街、北至皇后大道中。行一轉滿足曬你吃喝玩樂嘅願望，想睇香港一百五十幾年殖民地留痕，由水坑口街行向砵典乍街。有份籌辦導賞團嘅「活現香港」共同創辦人陳智遠話，「紅磚配綠瓦嘅香港中華基督教青年會會所，由芝加哥華人設計，但隔壁嘅樓梯街連接嘅，係起咗超過150年嘅文武廟」，中西合璧嘅畫面，香港獨有！

　　想欣賞藝術，沿荷李活道行，有藝穗會、PMQ元創方等古建築，記得唔好睇漏眼，荷李活道同嘉咸街交界、伊利近街、太平山街等街頭巷尾，畫咗唔少壁畫，打卡呃like是常識吧！影還影，小心交通！至於摩羅上街、士丹頓街、必列者士街開咗唔少古玩店，大把珍寶等你發掘。學古玩店「Select 18」印裔老闆Mido話齋，歐洲舊傢俬有錢唔難買，但本地舊物買少見少。搵心頭好，講心講金仲要講緣分。

　　肚餓？蓮香樓嘅百年港式點心、蘭芳園嘅絲襪奶茶、百年老舖玉葉甜品嘅海帶綠豆沙、泰昌餅家嘅熱辣辣蛋撻，抑或公利真料竹蔗水，中西任君選！唔啱嘅，去Soho區酒吧嘆杯啤酒！

　　陳智遠同鄭晴講，預計「舊城中環」深度遊喺下個月開始試水溫，每星期一團，每團收十多人。下次有朋自遠方來，諗諗！