新一份審計報告今日公布，曾經被審計署炮轟營運不善嘅香港郵政，原本想將年蝕400萬元、位於中環中心嘅皇后大道郵局「執笠」了事，但計劃出現變數，事關「執笠」計劃安排咗喺聽日中西區區議會轄下一個委員會會議上諮詢議員，而區議會內建制同「泛民」議員已經分別提出動議，阻止郵局「執笠」。
建制同「泛民」區議員分別喺原動議同修訂動議指，皇后大道郵局靠近社區同民居，對中環區人士嚟講，係重要嘅郵政設施，香港郵政應該繼續維持現有服務。其中提出修訂動議嘅陳財喜認為，香港郵政應該先檢討現時嘅業務，提供與時並進嘅服務，舉例話電子商務發展蓬勃，香港郵政可以考慮同電商合作，提供配送等服務，佢話：「生意唔夠就應該諗辦法搞活佢，『執笠』唔係辦法㗎」。鄭晴諗，中環話曬係香港金融心臟地帶吖，唔通真係連一間郵局都養唔起？
