香港郵政繼上月「自首」印錯郵票後再度犯錯!郵政日前提交畀中西區區議會嘅文件,指中環皇后大道郵政局一直蝕緊錢,所以計劃喺今年10月執咗佢,但就唔小心打漏咗個「萬」字,搞到文件入面原本應寫嘅「2015/16年度虧損超過四百萬元」,錯寫成「2015/16年度虧損超過四百元」(上圖),又搞出個大誤會。
向來做事純熟迅速嘅香港郵政,事發後當然經已即時「補鑊」,通知區議會安排修正,並將有關文件下架。但依鄭晴所見,香港郵政做嘢真係要落足眼力!事實上,署方上個月承認將「饒宗頤教授畫作及書法」郵票上嘅作品名稱,「閒中有富貴,壽外更康寧」,第二句錯印做「壽外處康寧」,搞到要延遲至今年九月先發行。