圖：梁永祥上咗六個鐘堂，尋日就幫咗位婆婆剪髮
「師傅，唔該幫我修下髮尾。」咦！望真啲，原來唔係師傅，係僱員再培訓局（ERB）主席梁永祥親自幫婆婆剪髮！
話說今年係ERB成立25周年，為咗推廣ERB課程，主席就特登揀咗個剪髮課程嚟學，「學識咗，第日都可以義剪做啲社會服務」，上咗六個鐘堂，主席話平時都係用一個假髮公仔剪，由長頭髮開始慢慢剪到變短。
唔敢搵老婆較飛
尋日主席仲即席幫一位牛頭角下邨嘅婆婆剪髮，主席笑言「好彩婆婆剪完都無發脾氣啫」，婆婆仲笑得幾開心添，梁主席話查實最難剪係髮尾，要彎低身睇清楚先可以落刀。至於有無幫太太修下髮，佢就話「點敢搵佢較飛啊！」
梁主席仲透露自己就剛剛收到通知，話會再續主席任期兩年，所以會繼續為ERB服務，任期會去到2019年3月31日。
鄭晴
