Dr. Lo認為，考察東江水工程的機會相當難得。
大公網3月29日訊 下月中就係復活節連續四日嘅假期，唔少港人都鍾意襯公眾假期機會去外遊，散散心，充充電。不過今年立法會議員們好多都無呢個機會喇，因為經歷一波三折嘅東江水考察團正正就係喺其中兩日假期內，唔少議員都要去考察，無得去玩喇。
經民聯主席盧偉國(Dr. Lo)，佢話自己應該係眾多議員中，對今次考察團最有興趣嘅一位，因為佢本身就係工程師，對輸送東江水嘅宏大工程相當感興趣。Dr. Lo仲話，另一個原因係因為佢細過嘅時候，真係經歷過制水「四日供水四小時」嘅日子，所以對東江水當年解決香港缺水問題，有特別深刻嘅體會，而且今次考察機會相當難得，所以就算本身有其他工作都交由其他人代勞。
民建聯葛珮帆(EQ)就話，佢都要去東江水考察團，所以原來諗住放假嘅計劃就會延後一兩日，先考察，再休息，對工作相當上心！EQ仲話自己而家努力搵緊機票，去邊都無所謂，只係想休息一下。同樣都係民建聯嘅周浩鼎(Holden)都係放棄假期上去考察，佢話暑假會再同老婆安排行程。
