圖：外交部駐港特派員公署署理特派員佟曉玲（中）、副特派員胡建中（左）、副特派員宋如安（右）一同主持facebook開張儀式

　　網上平台是時代趨勢，外交部駐港特派員公署都與時並進，前日（21日）以專頁形式登錄Facebook，仲有藍剔認證，絕無花假。

　　專頁前日上晝十一點發出第一帖，上載公署全景相又親切邀請「大家得閒來傾下偈啦」，有網民即時大讚「公署好靚」。喺傍晚就發帖舉行「帳號開通儀式」，署理特派員佟曉玲在帖文中致辭話：中國已成為世界網民第一大國，此次公署開通臉書官方帳號，「為我們的公共外交工作插上了翅膀，為公署與香港民眾交流溝通搭建了一個新平台」。佢又話，公署將利用帳號介紹國家發展、外交工作、涉港外交、中華歷史與文化等內容，公署亦將積極回應網民關切。

　　輕鬆幽默介紹中國外交

　　專頁「一開張」就通過輕鬆幽默嘅方式介紹中國外交情況，例如分享咗《人民日報》一張新聞照片，提到一名中國赴利比里亞維和員警防暴隊隊員，回國後同無見一年嘅新婚妻子擁吻，帖文話：後面班朋友……笑到咁……點笑都搶唔到鏡啦，咁呢個場面，講真又真係幾warm嘅。聯合國安理會有五個常任理事國，而派出維和人員最多嘅就係中國啦，亦係第二大出資國。依家有3000幾名維和人員喺南蘇丹、黎巴嫩、馬里等地執行和平任務。大家要了解多些外交知識，就快啲去Facebook畀like公署啦！