蓮塘／香園圍口岸工程嘅龍山隧道南行線鑽挖段前幾日正式貫通，新口岸即將成為香港同深圳連接嘅第七個陸路過境口岸，香港人日後又多個途徑往返內地喇。行政長官梁振英（CY）尋日亦就「蓮塘／香園圍口岸」發表網誌，仲話廣東係香港最大、最重要嘅經濟及社會發展夥伴，期待出年「蓮塘／香園圍口岸」通車之後，粵港將會有更廣闊合作平台。
CY話，蓮塘／香園圍既連接路，係粉嶺公路同蓮塘／香園圍口岸間嘅重大工程，長達11公里，當中龍山隧道就有4.8公里長，挖掘工程至今已完成超過一半，上星期南行線鑽挖段貫通更加係工程進度嘅重要標誌，意味着明年通車有望。
佢仲提到自己咁重視蓮塘／香園圍口岸，因為係香港好重要嘅東部過境通道，連接深惠高速至惠州及江西，深汕高速至汕頭、汕尾、潮州、揭陽等地。鄭晴聽落，咁到時香港往來粵東地區不單止更加快捷方便，經濟機遇亦會增多添！
