反對派「民主300+」選委早前集體宣布，話要全投票（all-in）畀民望最高候選人，希望藉此畀人公平公正感覺。不過，近日不同民調顯示，候選人林鄭月娥已有超前趨勢。專業議政召集人郭榮鏗尋日喺電台畀人問到，林鄭月娥民望如果最高，「民主300+」仲會唔會跟隨民意呢？郭榮鏗梗係唔正面回答啦，只係話相信香港人智慧，希望市民做正確決定咁話。
唔知郭榮鏗失憶定點，鄭晴記得，佢早前講過，會參考特首選舉民間全民投票（pop vote）結果作捆綁投票，尋日竟然轉曬口風話：「不是唯一參考」。連會計界梁繼昌亦幫口，話全民投票有結果後，民主300+選委就開會商討投票取向，除咗民望，仲會關注候選人政綱等。
郭榮鏗出席節目之後被問到，點解唔直接按結果投票時，仲死撐話因為全民投票有好多技術問題仍要處理，擔心有大型黑客活動影響結果，要等問題處理好再決定點參考呢啲資料。車！講來講去，其實咪都只不過係想留有一線，方便日後「龍門任佢搬」啫！
鄭晴
