大公網3月1日訊（記者龔學鳴）立法會議員開設facebook是常識吧！民建聯周浩鼎當然有開，嗰facebook仲突破三萬like，可喜可賀呢！佢就拍咗段短片感謝大家支持，Holden話，自己參加過新界東補選、立法會選舉，一直嚟到而家三萬讚好，覺得非常高興，希望爭取更多人支持。
另外，Holden亦不忘向大家匯報一下近日工作，早前係發展事務委員會上，佢要求水務署為部分村落提供食水，例如大嶼山有一條大浪村，多年嚟都無食水供應，議員一直有爭取，但水務署一直以該村無足夠人口拒絕供應，但係飲用食水係基本權利，所以藉水務署今次係委員會出現，第一時間要求水務署提供一個食水供應時間表，希望政府能夠正視。
Holden又提到，係經濟事務委員會上提出修訂動議，要求迪士尼同政府商討，就專利費同管理費作出檢討，特別係適當時候豁免收取部分管理費同專利費。迪士尼作為政府有份投資嘅項目，不應該讓迪士尼大幅蠶食公帑，而法國迪士尼樂園曾經因為一段時間盈利唔好，豁免收取管理費，證明有先例可循，最終修訂動議獲委員會通過。
