圖：立法會尋日舉辦新春午宴，特首、多名問責官員同行會成員應邀出席

　　立法會尋日舉辦新春午宴，特首梁振英（CY）、多名問責官員同行會成員應邀出席。主席梁君彥致辭時就話，今年係雞年，雞有五德，即係「文、武、勇、仁、信」，相信嘉賓同議員即使身處不同嘅崗位，只要具備五德，都可以得到市民嘅信任同尊敬。不過佢又講笑，指有啲議員唔止有五德，仲有「鬧得」同「鬥得」，咁就唔係咁好啦。

　　諷反對派鬧得又鬥得

　　睇下出席嘅議員名單，主要係建制派，反對派中只有社民連「長毛」梁國雄報名，不過佢最終無嚟。聽講現場唔少人都好奇點解「長毛」唔嚟，有人更講笑話「長毛」可能驚大家突然都「支持」佢參選特首，搞到要申報選舉開支添。民建聯葛珮帆（EQ）坐喺CY隔籬，佢同鄭晴講，席間有同CY傾過河套區發展、美容業界反對立法規管醫療儀器、禁止象牙買賣嘅事，至於特首選舉，大家就無傾過。

　　新上任無耐嘅政務司司長張建宗同財政司司長陳茂波，亦喺現場向傳媒拜年。曾經話自己九年無放大假嘅張建宗，究竟喺農曆新年有無放假呢？張司長就話，同大家一樣放「紅日」，無額外放假，又講笑話唔放假係「難度高危險動作」，呼籲大家「切勿模仿」。傾下傾下，張建宗又爆唔少返工金句，譬如佢形容自己好似球員同演員咁，「有得落場好興奮、唔想坐冷板櫈」、「有得演出好開心」。哇，有咁勤力嘅司長，啲下屬又點敢偷懶啊！