大公網1月23日訊（記者龔學鳴）廠商會會長李秀恆早前聯同多個文化界組織，組成大聯盟支持係西九文化區建香港故宮文化博物館，點知就受到反對派嘅攻擊，仲有周刊翻出二十年前嘅陳年往事，話李秀恆曾為介紹日本洗pat pat功能廁所，不惜「犧牲色相」，著住條孖煙囱上鏡。
李秀恆今日係「2016香港商界最關注的十件大事」評選頒獎典禮上兼職做主持個陣，就攞翻件事嚟解話，話佢屋企人對舊年大事嘅關注點同商界唔同，好似佢個女就更關注「孖煙囱」事件，仲直言「好瘀」。不過佢自己就不以為意，仲笑笑口咁話，「支持西九博物館就梗要被人瘀，呢啲預咗啦」，叫個女唔好將見識當大事或新聞。
