葛珮帆趁假期去維也納參觀廢物處理設施
大公網12月31日訊 （記者 龔學鳴）立法會最近休會，有立法會議員就趁放假去個旅行輕鬆嚇，但係民建聯葛珮帆（EQ）就選擇出外考察，重要係去奧地利維也納參觀廢物處理設施添。EQ話，維也納主要以焚化方式處理廢物，轉廢為能嘅技術十分成熟，值得香港參考。
原來EQ今次參觀嘅焚化設施，已經運作咗10年。佢話，自己響現場完全聞唔到有臭味，當地政府同民間亦都一直有監察空氣指數，未有發現空氣被污染。呢種廢物焚化設施，響維也納就有三個，全部距離市中心只有30分鐘車程以內，足夠處理當地超過170萬居民所產生嘅廢物。而焚化設施所轉化嘅電力除咗能夠自給自足，亦為2萬5千戶家庭提供電力，同埋響冬季為附近5千500個家庭提供暖氣。
EQ話，焚化只會產生少量唔能夠再用嘅灰燼，以堆填嘅方式處理，唔駛浪費大量土地興建堆填區。但香港單係討論興建焚化設施已經用咗20年，千辛萬苦落實興建嘅焚化設施都要響7、8年後先至落成，搞到依家都仲要繼續以堆填方式處理廢物，連EQ都忍唔住講句，香港實在太落後喇。
