大公網12月27日訊（記者 龔學鳴）：因為宣誓風波而搞到被取消立法會議員資格嘅青年新政梁頌恆同游蕙禎，佢哋分別響新界東同九龍西嘅議席已經被政府宣布懸空。雖然未知政府幾時會安排補選，但係反對派內部已經有唔少人對呢兩個議席虎視眈眈。最近仲有消息指，連本土派都計劃派人參選，人選有可能係中大學生會前會長、學聯前常委張秀賢。

　　早前諗住參選選舉委員會高等教育界選委嘅張秀賢，因為不被選舉主任信納佢同界別有密切聯繫而被取消資格，點知轉個頭就傳出有意玩立法會補選「爭櫈仔」。有消息話，如果張秀賢真係參選，唔會行「港獨」路線，而係行親「泛民」路線，以溫和形象向反對派和本土派支持者「吸票」。

　　除咗張秀賢，前民主黨員鄭家富同埋連任立法會議員失敗嘅新民主同盟范國威都話過會考慮參加補選；反對派亦計劃搞初選，希望可以協調到一人參加補選。不過，民主動力召集人趙家賢就話，未有本土派聯絡過佢哋。本土派向來都同傳統反對派政黨冇乜偈傾，睇嚟都唔駛旨意本土派會參加初選喇。

　　另一邊廂，響九龍西已經有一席嘅民主黨，似乎想藉補選搶多一席。其中，民主黨司庫袁海文一早就話想參加補選。佢接受媒體訪問時就話，希望能夠代表民主黨參與反對派初選。不過，據聞民主黨內部有聲音話，嚟緊嘅補選應該讓俾早前立法會選舉失利嘅反對派細政黨參選，袁海文能唔能夠得償所願，睇嚟都仲要觀望嚇一段時間。