圖：寫滿CY政績嘅掛曆，由柯創盛轉交畀CY/網上圖片

　　特首梁振英（CY）早前宣布不謀求連任，唔少支持者都感到意外同傷心，香港政研會尋日下晝就喺政府總部外面舉辦「送上祝福 說聲感謝─祝福CY集會」，表達不捨之情。

　　CY回覆感謝支持

　　多名各界知名人士都有參加集會，包括香港中華出入口商會會長張學修、足總副主席貝鈞奇、香港專業聯盟主席劉炳章、港區省級政協委員聯誼會會長譚錦球、前全國人大代表曹宏威等。佢哋回顧CY過去幾年嘅政績，大讚佢努力為市民上樓搵地起屋、辣招壓抑樓價、和平解決非法「佔中」、嚴打「港獨」勢力，充分證明佢嘅沉穩毅力同迎難而上嘅精神。

　　集會仲吸引超過100名市民參加，有市民主動上台分享話，對CY唔連任感到可惜，覺得是香港嘅一大損失，祝福佢完成餘下任期，日後在其他崗位一展抱負。睇嚟CY嘅成績大家都默默地記喺心入邊，平時無乜機會表達，難得有機會梗係不吐不快啦。另外，香港政研會仲自製咗寫滿CY政績嘅掛曆，已由民建聯立法會議員柯創盛交畀CY。

　　CY尋晚都係Facebook發帖，話尋日下午有市民集會支持佢嘅施政，感謝市民一向嘅支持和提點。又承諾會喺餘下任期繼續致力發展經濟，改善民生，盡心盡力去為市民解決老大難嘅問題。