立法會議員大合照。黃洋港/攝
大公網11月29日訊（記者龔學鳴）新一屆立法會議員今日響立法會大樓內影大合照，總共有61位議員出席，唔計被取消資格嘅青年新政梁頌恆同游蕙禎，有7名議員未有參與，包括劉小麗、朱凱迪、鄭松泰、郭偉強、陸頌雄、何啟明，同埋梁志祥。另外，香港眾志羅冠聰就因為遲到，搞到俾成班議員噓爆，認真尷尬。
晏晝四點半，一眾議員陸續抵達立法會地下大堂集合，聽從秘書處同事嘅指示，排好曬位準備影大合照。正當大會攝影同在場媒體已經影夠，諗住收工之際，羅冠聰急急腳趕到。成班議員見佢姍姍來遲，一致以笑聲同噓聲「歡迎」呢位議會「新丁」。有議員就講笑話，又要再麻煩大會攝影影過張靚相嚕。之後，羅冠聰就尷尷尬尬咁攝響民主黨鄺俊宇隔離影相。
其實羅冠聰之前已經因為出席電台節目時遲到，搞到俾節目主持「溫馨提示」，話議員守時係好緊要。其實，影相遲到事小，但畀人感覺就好似唔多尊重其他議員囉，希望羅議員以後能夠有返多啲時間觀念啦。
