總商會主席吳天海（右）表示，活動是總商會回饋市民的小小心意。大公報記者周禮希攝
大公網11月17日訊（記者周禮希）香港總商會本月29日慶祝創會155周年，舉辦第六屆「總商會全程為您」，請全港市民免費搭電車同天星小輪，商會仲同一個傳媒機構嘅APP合作，送出總值港幣十萬嘅現金禮券。
香港總商會主席吳天海話，總商會一直致力為商界發聲，同會員、市民同心協力，促進香港的經濟繁榮，今次搞免費乘搭日係總商會回饋市民嘅小小心意。吳天海仲話，電車同渡輪喺當年地鐵通車後喺困境中尋找到新出路，就好似香港商界、市民嘅生命力咁強勁。
今年活動有別於以前喺5月29日創會日舉行，總商會總裁袁莎妮解釋，因為今年創會日係星期日，活動改喺11月29日舉行，一來有更多市民受惠，二來亦係因為有市民反映秋天搭電車同小輪更加舒服。吳天海就話，咁樣咪就係從善如流囉。講返個APP，市民只要喺今日至29日內用個APP答啱問題，就有機會獲得價值100至500蚊嘅現金禮券。今次免費乘搭日電車將會全線全日免費，而往來尖沙咀至中環同灣仔的渡輪亦都一樣係免費。
