大公網11月17日訊（記者龔學鳴） 青年新政梁頌恆、游蕙禎兩人被取消議員資格，仲牽連十幾名反對派議員都可能被DQ（Disqualified，取消資格），禍港四人幫之一嘅民主黨創黨主席李柱銘尋日係電台節目中指，雖然口講唔知梁、游係唔係「鬼」，但就暗示話，他們嘅行為無邏輯，又無證明曾參與過「佔中」，而家仲將「港獨」同侮辱中華民族兩事拉埋一齊，先至引起一場大風暴。

　　唔知李柱銘係咪睇《無間道》睇得太多上咗腦，居然將兩個「港獨」分子嘅激進行為講成一齣諜戰大劇。不過，佢有咁嘅唸法都不足為奇，因為「激進本土派」一直唔肯同傳統「泛民」埋堆，行動我行我素，亦唔同「泛民」商量，無論係宣誓事件定係之後嘅衝擊會議廳，「泛民」每一步都被人牽住鼻子走。

　　對「激進本土派」嘅行動只有配合或唔配合嘅選擇，逐漸喪失主動權，所以「泛民」呢幾個月都由積極配合逐漸變成有意劃清界線，想要改變呢一個現狀。如果將梁、游打成「鬼」，自然有利於「泛民」擺脫「激進本土派」嘅影響。

　　不過，追根溯源，如果話梁、游係「鬼」，咁都係「泛民」自己一手養出來嘅「鬼」。試唸下，當初係邊個參加非法「佔中」，係邊個對旺角暴亂、衝擊中聯辦等違法暴力行為視若無睹先？如果「泛民」可以是其是，非其非，唔會因為對方同屬「反對派」就予以包庇，亦都唔會令香港社會滋長出呢種激進嘅風氣，唔單止搞到香港亂象頻生，亦令自己進退維谷。對整個香港社會嚟講，究竟本土派係「鬼」，抑或係打住「民主」旗號，一直搞亂香港嘅人先係真正嘅「鬼」呢？