大公網11月10日訊（記者許嘉信）一啲無法預測嘅重大事件一旦發生，會有好大嘅影響力，就係所謂「黑天鵝效應」，例子除咗有英國脫歐，當然唔少得美國共和黨特朗普成功勝出美國大選。正當外界對「狂人」勝選會對環球經濟有咩影響而議論紛紛，金融界立法會議員陳振英就洞悉先機，響大選前該表自己嘅公積金投資計劃，避過早前嘅股市波動。
陳振英話，自己一直都係將公積金投資響保守或者有保證回報嘅基金，幾年前先開始改為投資美國同中國嘅股票基金。兩個禮拜前，佢嘅朋友話10月通常股市都會下跌，加上美國大選嘅選情又唔明朗，所以佢決定轉返去保守基金。
大選結果一出，特朗普成功當選下任總統，更觸發環球股市波動，港股前日亦不能倖免，不過陳振英就逃過一劫嚕。佢話，未知特朗普上任後會有咩政策，而美國加息嘅步伐亦可能會有變數，目前都係傾向投資得保守啲，觀察多一段時間之後再作打算。
