大公網10月31日訊 唔知今晚萬聖節係咪全街都係Harley Quinn呢? 不過呢，凡事都有例外嘅。民建聯立法會議員張國鈞(Horace)尋晚係facebook發表一條短片，就係Horace兩個寶貝女大喬、小喬，同一班民建聯議員玩Trick or treat。大喬小喬就披上橙色披風、戴住黑色同紫色嘅帽，好可愛咁跟住Horace周圍行。第一個就係遇到Holden，不過Holden就話無糖，唯有接受「懲罰」啦！就係帶住副玩具眼鏡同埋小丑鼻。大小喬見到Holden嘅得意打扮，仲笑得好開心添！跟住第二個就係阿Ben，不過都係無糖。
之後大小喬就見到Ann姐啦！佢哋跟住Ann姐跑入辦公室，而今次終於有收穫啦！Ann仲要求大小喬俾個飛吻添！話口未完，主席Starry就神秘咁入咗嚟，送咗啲糖俾大小喬。最後一站，佢哋就去咗搵克勤，點之克勤又話無糖。不過，驚喜在後頭，克勤無啦啦攞咗個大南瓜氣球出嚟，氹到大小喬相當開心呢！Horace最後就叫大小喬唔好咁快食曬啲糖，因住蛀牙呢！
