圖：點解唔理我喎？ /設計對白
梁君彥已經當選為立法會主席，至於英籍問題，佢早前亦都親自喺傳媒面前拆開英國內政部寄嚟嘅信件，證明九月三十號已經放棄咗英籍，仲有蓋章添！不過朱凱迪就點都唔信，唔知係咪因為英鎊跌得好勁，日前更專登飛去英國倫敦，要求內政部解釋喎。佢前日就發表聲明，批評保守黨「極端效率」和「不正常」行政手段，確保梁君彥議員能及時處理國籍放棄手續。
到底呢套鬧劇有咩新發展呢？佢尋日接受電台訪問，話英國內政部回應係「不會評論個別事件」，又好委屈咁話「睇嚟英國政府呢一面唔係好理我哋」。
朱凱迪呢啲言行真係笑到鄭晴肚痛。英國內政部做嘢，需唔需要請教香港立法會議員呢？阿朱議員憑乜嘢要求英國內政部畀嗰解釋你？仲有，睇下佢哋示威嘅標語「Give Hong Kong an answer」，真係何其無禮！大佬，好心真係學下英文啦！正經嘢唔做，反而專登飛去英國，除咗做show之外，真係諗唔到有咩原因。平時咁鍾意環保，你咁樣專登飛去英國呢，飛行碳排放係好多、好唔環保囉！
鄭晴
