圖：游蕙禎娘娘九月七號「出巡」謝票嘅時候，紋身個位置都仲係包到密密實實
游蕙禎最近畀記者影到手臂內側有紋身，唔少家長都驚驚哋，覺得游議員以後喺立法會騷紋身，小朋友可能會有樣學樣。未正式宣誓做議員就搞到一班家長咁唔妥，唔少游蕙禎嘅支持者就建議佢考慮洗咗個紋身，唔好搞到咁大爭議。
換着選舉期間，游蕙禎可能仲會諗下人哋嘅建議；不過今時唔同往日，「尊貴嘅」游議員尋日就高調咁回應，話：「唔會因為做議員而去洗紋身」。咁寸嘴，自然搞到一班網民嬲嬲豬啦。唔少人就搵番游蕙禎選舉期間嘅相，大鬧佢當時出席活動，次次都用縛臂帶遮住自己個紋身。直到九月七號，佢去紅磡謝票嘅時候，紋身個位置都仲係包到密密實實。當時仲落雨濕濕，游蕙禎自己顧住低頭玩手機，隔籬嘅猛男助手就幫手擔遮，個款真係好似娘娘出巡咁。
不過，鄭晴都忍唔住要問，如果游議員真係咁威威，咁有本色，唔怕給人知道自己有紋身，咁當時點解又要遮遮掩掩啊。其實游蕙禎之前喺《大公報》度做實習嗰陣都已經係咁，自己做單普通採訪都給採訪主任「彈稿」N次，辭職之後就突然寸神上身咁反咬一口。鄭晴就希望佢以後做議員嘅時候，唔好又重蹈呢個覆轍咯。
