日本大叔主唱嘅神曲《PPAP》搞到鄭晴facebook不斷被人洗版。首歌好簡單，只係提咗Pen、Apple、Pineapple呢三個簡單英文字，相當洗腦。一向緊貼潮流嘅大嘥鬼當然玩埋一份。佢尋日喺facebook貼圖，就話「喺芸芸生果當中，Apple同Pineapple都算係我嘅最愛」，之後仲教育大家「玩還玩唔好插支筆落去」，後面亦有一堆日文字。

　　不過呢，搞笑嘅大嘥鬼梗係唔止咁簡單啦！今次仲要模仿日本大叔，加咗「二撇雞」，仲有豹紋披肩，真係扮得維肖維妙喎。另外，有眼利嘅網民發現，「鬼鬼個日文名係拼做『dai sai guai』，正！」大嘥鬼回覆時仲話：「有人留意到彩蛋」。亦有網民話：「好抽得！」佢就幽默咁話：「打風前濕度少少高」睇完大嘥鬼嘅帖，鄭晴真係心情愉快。

　　除咗大嘥鬼，估唔到香港警察嘅facebook亦唔執輸，推出「路路安全 BBSB ─ Belt Buckle Seat Belt」，有幾位阿Sir同Madam戴黑超粉墨登場，喺警車入面手舞足蹈，提醒司機同乘客扣好安全帶。 　　其中一位友情客串嘅阿sir仲係歌手張繼聰細佬張繼安添。其實鄭晴就覺得PPRB都可以整一首模仿《PPAP》嘅神曲呢。

　　講開警隊，香港航空昨日就宣布，委任已退休五年嘅前「一哥」鄧竟成為董事會副董事長及執行董事，將負責公司嘅重大發展策略。