大公網9月27日訊 「港獨」推手陳雲呢排樂得清閒，繼續做「鍵盤戰士」，一日到黑喺facebook發帖，不過陳雲今日居然分享本報質疑蕭若元幕後撐本民前嘅報道，又話「《大公報》追查梁天琦的金主，揭發驚人內幕。金錢線，就是權力線。」仲話「香港所謂偽冒獨派，大家好快知道底」

　　其實，本民前嘅真面目如何，本報一直有報道，陳雲而家先走嚟share，就真係有啲後知後覺囉！有部分「迷雲黨」支持者就大讚本報，仲不忘恥笑本民前，網民NG Ka Lun話「 時代醫療！時代革命！」另一網民Cosmo Ching就話「原來時代革命的時代係咁解。」

　　不過呢，蕭定一今日回應《蘋果日報》查詢時，就話報道係抹黑佢爸爸蕭若元，但佢就係咁同爸爸劃清界線，聲稱「商業業務上我們早已分家，而我們在政治取向上有所不同，亦是人所共知」。他又指「敢以性命擔保，有生之年都不會支持港獨」等等，蕭公子咁樣誓神劈願話自己反港獨，又話同爸爸政治取向不同，咁蕭生係撐「港獨」呢，定係反「港獨」啊？蕭若元自己就係網台節目話，自己過去十幾年無大量資助政黨日常經營費用，今年「斗零」都無。佢還強調，自己從來都睇唔起本民前，反而一路狙擊本民前幾十萬嘅金主係邊個，任何人煽動族群仇恨就係佢大敵喎。真相究竟係如何，《大公報》也會繼續追蹤，請大家拭目以待啦。