大公網9月27日訊（記者許嘉信）新一屆立法會將會響下月中「開鑼」，立法會大樓除咗會有一批新面孔嘅議員進駐之外，一啲新嘅系統同設施亦都即將投入服務，方便議員工作，其中一個亮點就係推出咗新嘅電子表決系統。究竟內裡有咩乾坤？等鄭晴為大家先睹為快啦！

　　過往嘅立法會會議，議員如果要就各項議案進行表決，需要利用安裝響佢哋座位前面嘅電子表決系統投票，呢個系統由5年前立法會大樓落成一直用到依家。立法會秘書處話，原有系統用咗咁耐，開始出現老化，亦有議員反映過撳掣投票會出現問題。

　　有見及此，秘書處就推出新嘅電子表決系統，議員日後需要利用座位前新安裝嘅平板電腦投票，屏幕除咗會顯示訊息，提示議員會議去到咩階段同埋議案內容之外，仲可以俾議員翻查自己過往嘅表決結果。秘書處話，新系統較舊系統更容易進行維修，系統穩定性都較高，至於舊系統嘅收聽即時傳譯功能就繼續運作。

　　要加入邊啲委員會，都係議員需要細心思考嘅問題。秘書處今次亦新推出一個網上系統，俾議員示明加入邊啲委員會或小組委員會，取代以往利用傳真通訊。議員只需要登入系統，就可以進行報名，仲可以睇到各個委員會有邊啲議員報咗名添，認真方便。

　　另外，每年都有好多公眾人士嚟立法會大樓參觀，不過就冇得零距離接觸議事堂。因此秘書處就搞搞新意思，響地下大堂展覽區旁邊增設模擬主席台同埋議員座位，俾參觀人士「打卡」，過嚇主席癮同議員癮。相信立法會復會之後，呢個新景點一定深得市民喜愛。