吳秋北與海綿寶寶合照。（網絡截圖）

　　大公網7月25日訊 參選立法會港島區直選嘅工聯會理事長吳秋北（秋北）一副書生模樣，估唔到都童心未泯，鄭晴發現佢喺Facebook個人專頁連開幾個post都有關動漫喎！日前秋北路經一個商場時，見到海綿寶寶就立刻同佢Selfie，話要畀小朋友開心一下喎！不過呢，秋北影相時都不忘工聯身份，對於自私貪錢嘅蟹老闆、奸詐嘅皮老闆，就唔會同佢哋合照啦！佢仲話，海綿寶寶發放團結嘅正能量，同埋都係目前抵制政客撕裂社會嘅有力法寶添。

　　之後秋北又去一個漫畫迷嘅聚腳點，發現一本漫畫關於電車發展過程，又話電車與港島市民息息相關，同時仲勾起工聯會為電車工人爭取權益歷史，例如早前保護電車路段一人一信行動，希望電車不斷改動及有新面貌。

　　今日Pokémon Go啱啱有得玩，秋北開新post話，應該會有幾隻寵物小精靈陪佢做街站，夜晚點都會陪囡囡一齊玩，仲提醒大家「記得睇路！小心撞柱！安全第一！」

　　吳秋北在工聯會港島參選名單排第二，名單頭位係郭偉強，該區參選名單還有：民建聯張國鈞、新民黨葉劉淑儀、民主黨許智峯、公民黨陳淑莊、熱血公民鄭錦滿、香港眾志羅冠聰、獨立司馬文、王維基、沈志超，民主思路黃梓謙。