圖：內地銷售人員「人盯人」推銷

　　受惠於中央政府落實「粵港澳大灣區規劃」，以及港珠澳大橋即將落成，區內城市樓價升幅凌厲，吸引本港投資者或有意北上置業兼退休人士青睞，當中以位於大灣區中心的中山、惠州及江門最受熱捧。灣區睇樓團乘勢湧現，網絡中介以至地產舖組團幾乎天天出發，有中介推出「18蚊」中山睇樓團，記者報名參加，直擊港人北上「40萬做業主」實況。/大公報記者 方學明（文） 　王祺（圖）

　　業內人士指出，自從今年三月「粵港澳大灣區發展規劃」寫進中央政府工作報告，區內各城市樓價已有不同程度上升，當中以價格相對較低的中山、珠海等樓價升幅最為明顯。在珠海任職地產經紀的鍾小姐向《大公報》表示，目前珠海新盤最低價每平方米二萬元（人民幣，下同），中山樓每平方米平均超過一萬五千元，較大灣區寫入政府工作報告前，升幅至少三成。

　　包食包接送 一圍枱九道菜

　　灣區樓價節節上升，本港最近湧現內地睇樓團，當中有網絡中介，也有地產舖舉辦，團費由免費至一百元左右不等。《大公報》記者為查探虛實，日前報名參加一個「18蚊」中山包食包交通一天實地樓盤考察團。

　　「18蚊連一碗雲吞麵都食唔到啦，而家竟然去到中山玩一日，梗係要試下！」同團一名香港參加者向記者說。該團由大埔一間地產舖舉辦，行程先在羅湖口岸對面的茶餐廳集合，出發團友連同兩名工作人員合共11人，乘坐專巴由羅湖直馳中山阜沙鎮，車程2.5小時。

　　專巴行駛期間，職員在車廂先介紹樓盤一帶的交通，「我哋去嘅樓盤喺中山商業區內，好近中山北站，亦係第時深中通道落腳點附近，交通好方便，由香港坐車過去唔使50分鐘。」

　　40萬做業主 稱有六厘回報

　　職員亦講解樓盤基本資料，「我哋一陣睇嘅叫『商住房』，佢係唔受而家中山限購政策影響，你哋買幾多層都得，最平40萬人民幣有33平方米，最貴80萬有67平方米，如果買咗唔想即時入住，可以將單位租畀發展商旗下子公司，用嚟做酒店房出租，每月攞返900蚊人民幣，折合有六厘回報。」

　　不少團友聽到六厘回報甚為雀躍，不斷追問：「要簽幾耐約？如果間酒店執笠點算？如果我第時想住返，係咪可以攞返同新樓一樣嘅交樓標準？」職員回答稱酒店不會倒閉，日後買家收回單位時亦會與新樓交收時的標準相差無幾。

　　睇樓團抵達樓盤現場，職員先安排團友到附近一間酒樓用膳，一圍九道菜甚為豐富，各人用膳後再往睇樓。進入樓盤展銷廳時，約十名內地地產推銷員早已夾道歡迎，當對樓盤作簡單介紹後，推銷員便幾乎「人盯人」貼身帶團友登現樓參觀，同時游說「入貨」，「而家香港有40萬有咩用？但呢度可以買層樓喎！仲可以得閒返嚟住添！」

　　記者稱需要考慮時，推銷員隨即說：「唔使考慮啦，考慮就冇㗎啦！你睇其他團友都準備買啦！幾十萬之嘛，又唔係多！」其後各團友被帶到展銷廳作單位實價計算，記者被安排由兩名推銷員特別「招待」：「你決定買邊個（單位）呀！我哋可以即時匯款，買咗咪做業主囉！」雖然記者最終「無幫襯」，推銷員亦沒再糾纏留難。現場所見，有團友即場落訂購買。

　　美聯中國外銷及市場企劃部總經理林世昌指，大灣區城市中，以中山樓價升幅最明顯，年初至今已升超過五成，睇樓團反應熱烈，他以其公司獨家代理的另一個中山樓盤為例，發展商推出100個單位，出售當天已經賣出70個，當中三分一是香港睇樓團客即場購買。

　　林亦特別睇好中山的未來升值潛力，「以大灣區整體而言，目前仍處較低水位嘅有中山、惠州、江門同肇慶等市，由於中山落實起深中通道，深茂高鐵亦喺中山北站設站連接深圳北站，令到港人未來北上中山更加方便，係中山受港人歡迎原因之一。」然而，林提醒港人內地置業亦需留意樓盤位置、發展商品牌等因素。

　　業內人士提醒，港人在內地置業須留意不同城市的限購政策，例如目前大灣區只剩下惠州、江門及肇慶部分郊區地方不設「純住宅」（商品房）限購令，其他地方港人可以購置的以不受限購影響的「商住房」為主。