大公網訊 記者馮瀚林報道：幫助弱勢社群，大家會諗到咩方法?捐款?做義工?點樣先可以幫到最多嘅人?大家可以參考香港銀行公會，銀行公會聯同東華三院旗下嘅社企「煮餸易CookEasy」合作，搞咗一個香港銀行公會「餸」暖關愛社區計劃，呢個計劃將會係今年七月至十二月舉行，為天水圍、屯門、葵青、深水埗、荃灣、大角咀及港島南呢七個地區嘅獨居長者同低收入家庭派發營養均衡嘅餸菜包，估計有一萬人受惠。另外，銀行公會嘅義工亦會親力親為，同埋一班青年及婦女義工，一齊為獨居長者整午餐，仲會探訪獨居長者同埋派餸菜包添。
香港銀行公會於七月至十二月期間，舉行「餸」暖關愛社區計劃。(大公報記者馮瀚林攝)
點解會諗到呢個方法呢?香港銀行公會署理主席龔楊恩慈就話，希望藉呢個計劃，引起公眾對獨居長者、有需要人士，以及社企嘅關注，而CookEasy仲可以俾銀行公會有一個義工參與嘅機會，同時呢個計劃支持社會聘用殘疾人士，為佢哋提供就業機會，實踐香港銀行公會積極投入社會服務嘅精神。署理行政長官張建宗都話，呢個計劃一舉幾得，希望民、商、官協助，一齊做好關注弱勢嘅工作。
