一些內地人學香港人叫結賬為「埋單」，但以為是「買單」。
其實「埋」在粵語中除解「埋葬」「埋藏」外還有不少用法。像「埋單」的「埋」就是「結」的意思，商店打烊後，要算一算當天做了多少錢生意，就是「埋數」。生命的終結，幽默的說法是「埋單」，某人多時不見，原來已「埋單」。
「埋」也解作「完成」。阿媽話：「做埋啲功課先准玩！」爛賭二輸埋鋪身家才離場。勞工階層話：「辛苦搵埋自在食（辛苦賺到錢之後要舒舒服服地享用）。」
「埋」也是「靠近」，踢足球「埋門」一腳，入波了。他好功夫，十個八個人都唔埋得佢身。一個人學好還是學壞，要看他跟什麼人「埋堆」。近朱者赤，近墨者黑，父母要留意子女跟什麼人「行埋」。不過女人對閨密抱怨老公已多時冇同佢「行埋」，卻是要「行埋一邊」才方便講。
常聽到街頭小販呼喊：「埋來揀，埋來揀，廿蚊有三份！」過去看看無礙。大漢呼喊：「發財埋邊」，「埋邊」是進裏面，只怕你進去之後會後悔。
