圖：陸頌雄近日化身「外賣步兵」，親身體驗當中苦況。
疫下唔少行業搵食艱難，由於外賣員門檻不高，唔少人紛紛轉行送起了外賣，但呢份零工係咪真係咁易做呢？工聯會立法會議員陸頌雄近日就化身「外賣員」，在屯門當「送餐步兵」三小時，體驗當中嘅工作苦況。
街上差錯腳險仆親
陸頌雄當日下午4時45分開始返工，半個鐘後才收到首宗送壽司訂單，完成後賺得34.12元，他直言「比最低工資更低」。隨後，外賣App又提示因為送餐過程中有幾單未接，賬戶被鎖15分鐘，令他大感委屈：「我係新人啊！好大壓力。」儘管他自言有「腳長」嘅優勢，但三個鐘內亦僅僅完成三張訂單，賺到百餘元。
體驗過後，自言在屯門長大，「半主場作賽」嘅陸頌雄仍大嘆這份工作不易：「想要做成功，必須非常熟悉社區；而送餐途中又要保證食物『夠靚』，以免被投訴。」送外賣期間，陸頌雄還在街上差錯腳，險些「仆親」。他感慨外賣員沒有工傷及勞工法例的保障、年假等福利，如果踏單車或者駕駛電單車送外賣風險更高，佢促請政府盡快檢視外賣平台嘅僱用模式，令從業員有勞工保險，並享有最低工資，從而避免外賣員被剝削。
