「你話曬係戴罪之身，仲懶懶閒咁，簡直無恥！」高院法官昨日痛批社民連主席吳文遠，事緣三年多前，吳因披露時任民政事務局常任秘書長馮程淑儀被廉署調查，其後被判囚四個月。案件一拖再拖，他昨日到高院處理上訴申請時，法官相當勞氣，質疑本案「仲有咩好拗」，又斥責吳對上訴「拖得就拖」，還直斥他「無恥」！

　　吳文遠於今年六月已被高院駁回上訴，但拖延長達半年才向高院申請許可向終院上訴，難怪被法官張慧玲痛斥。有幾何法官會鬧到咁盡？張官直言，本案只涉事實裁定，完全不涉及重要的法律觀點爭拗，於是質問吳文遠：「有咩好拗啫？」「有咩法律觀點啫？無！」「你留返去終審法院講啦好無？你唔會說服到我！」隨即駁回吳的申請。

　　不過吳文遠仍有權直接向終院申請上訴，他向張官申請繼續保釋時，張官繼續連珠炮轟：「個判詞六月落㗎喎，依家12月，成半年喇喎依家，（七月）我畀你保釋就係畀時間你上訴，費事太耐怕你白白坐監，但你次次話無律師、要申請法援、法援大狀話單案無得拗，你話曬係戴罪之身，仲懶懶閒咁，簡直無恥！」庭上更透露，今次得以開庭，亦是因為法官透過書記致電催促，才能成事。

　　最終張官只批准吳文遠再保釋一個月，促佢把握時間，在一個月內向終院申請上訴及申請繼續保釋，否則就要繼續完成餘下31日刑期才能上訴，要他「好自為之」！