《大公報》10月15日刊登英國駐港總領事館署理總領事彭雅慧致大公報總編輯的信函，內稱《大公報》八月報道英領館向撐「港獨」的「華人民主書院」（「獨書院」）批錢資助亂華項目「失實」及「誤導」，要求撤回。此舉認真搞笑，亦認真畀面，雖版面緊張，也不得不再奉陪下，皆因英領館確確實實對港人欠交代，欠解釋。

　　《大公報》並非口講無憑，確是有一封2013年1月14日英領館政治事務副領事卓金韻慧寫給鄭宇碩助手陳家偉的電郵，白紙黑字寫明「好消息，我們的基金經理們已批准資金，原則上資助冬季營或校園活動，作為一次性撥款項目支持華人民主書院」（見電郵圖片），更寫明批三萬至三萬五千港元。

　　英領館稱無畀到錢，作為盡責的傳媒，《大公報》多番追問這封「批款電郵」細節及「閂水喉」原因，英領館始終不作答。難道有人將那錢「落格」貪污咗？鄭宇碩收錢時唔小心跌落大海？《大公報》只好一五一十報道，擺事實給讀者看看。

　　英領館也許真的急了，講不出《大公報》報道錯在何處，索性將給《大公報》的信函刊登在英領事館Facebook，其意思難道想告訴港人：我唔只係揼水畀亂港反華大小漢奸呀，仲資助埋其他公益事業添，唔信睇下封信下面有講㗎。真是欲蓋彌彰，笑死人！其實用不着緊張，你領事館數百上千人，唔通只係簽證咩，梗係多嘢做啦！

　　最弔詭的是生果報好快手以即時新聞報道主子呢個小兒科動作，以偏概全作大話「英領館致函《大公報》話報道失實促撤回」。如此神速，難道生果報有專人24小時盯住主子英領館的fb？或者一早約定？

　　一向為反而反、寫啲唔寫啲嘅生果報，報道焦點放大喺英領館信函中話會資助醫藥、停止人口販賣、新聞自由及同志平權的項目，幫英領館淡化了政治角色。生果報都應該抽時間看看《大公報》擴闊視野。早於去年三月《大公報》就報道過四處搞「顏色革命」嘅索羅斯嘅「開放社會基金會」聯同英國駐港總領事館，於2016年贊助戴耀廷任職的「比較法與公法研究中心」與港大新聞與傳媒研究中心合辦的「媒體法律與政策」活動。

　　英領館同戴耀廷好鬼熟，網上電郵披露過英聯邦武器出口政策出身的Sarah Docherty，於2014年1月至6月以時任英領館政治事務部長身份三次約見戴耀廷，同年九月英領館再發電郵給戴耀廷再見一面。英領館高層不止約撐「獨」的戴飲茶，2015年2月英領館職員Vivian Wong發電郵給戴的拍檔鄭宇碩，話Sarah Docherty要約鄭宇碩飲咖啡。英領館頻約亂港反華分子的多封電郵公開曬，英領館又無話係假電郵，生果報睇唔到英領館嘅政治動作，係咪要驗眼？ 大公報記者施文達