圖：古時的襪子穿上後須以「襪帶」繫緊

　　「執到」的表面意思是檢獲。人們通常用「你執到喇」來形容人從沒想過可得到卻獲得了，帶點僥幸成分。

　　示例1：

　　輝仔，你朝思暮想個為為，而家應承同你去行街睇戲，「你執到喇」！

　　如檢獲的屬於珍貴的東西，人們會說那是「寶」。「執到寶」是用來形容人意外地得到一些不錯的好處。

　　示例2：

婷婷：輝仔，乜咁「high」（興奮）呀？

輝仔：正話執到部手機，新嘅要成萬銀，算「執到寶」囉！

婷婷：你知乜叫「拾金不昧」呀？

輝仔：婷婷，執到金就話啫！

婷婷：咁即係唔會交番出嚟喇！

輝仔：冇有錯！正所謂，「地上執到寶，問天問地攞唔到」，哈哈……

婷婷：唔好意思，你執到嗰部手機係有追蹤功能嘅；你用，等拉喇！

　　表面上，檢獲東西的人會暗地裏高興，可這不是放諸四海而皆準，要是檢獲的為當事人帶來麻煩，那就是得不償失，「偷笑」轉為「偷哭」了。以下俗語展示了這個境況：

　　示例3：

母：阿仔，以為你娶咗個知書識墨嘅老婆，可以相夫教子，點知佢原來係「三等人」，唉！

子：阿媽，乜係「三等人」呀？

母：等食、等瞓、等打牌囉！咁都算嘞，仲話驚身材走樣，唔生喎！

子：初頭班「姨媽姑爹」（親戚），話我娶到個咁老婆係「執到」，點知整整下走曬樣啫！

母：你係「執到」呀，不過係「執到都喊三聲」知嘛！

　　古時的襪子穿上後須用一條叫「襪帶」的帶子繫緊。

　　假設你在街上撿到一束襪帶。返家途中，你想着有了襪帶，有雙新鞋子配上就好了，於是你買了對新鞋子；穿上後，你覺得現時穿的褲子不太合襯，於是你買了條新褲子；穿上後，你覺得還是欠了些；卒之，你一口氣買下皮帶、外衣和帽子；此時你才覺滿意，可看看口袋，錢都花光了！從這個經歷，你深深體會到：

　　此話比喻撿了丁點便宜，卻帶來巨大損失。

　　示例4：

　　嗰晚舊生會聚餐抽獎，輝仔抽到支紅酒；成班同學要佢請食宵夜，順便開埋嚟飲。埋單成兩千銀，支酒咪一百幾十，都可謂「執條襪帶累身家」嘞！

　　【「粵語方言用字：執」之八】