促檢討外判制度
月姐（清潔工）：
做咗10年清潔工，都係得七日大假，因為外判公司每兩年投一次標，投唔到就要炒人，年資就要重新計過，我最長一間公司只係做過三年，而家人工得1.1萬，做26日！咁耐無假放，做到手痛腳痛，唯有自己捽藥油，連仔女都無時間見，作為媽媽個心都好唔舒服！
反對擴大輸入外勞
方先生（燒焊工人）：
建造業好唔穩定，我已經個幾月無工開，要靠老婆做多啲兼職家務助理幫補家計，自己都唔出街、唔開冷氣，希望慳得幾多得幾多。之前都試過兩個幾月無工開，若政府輸入外勞真係搶飯碗，要我食穀種！
爭取14周全薪產假
盧小姐（前百貨公司職員）：
生女女時產假係前四後六，得五分四人工，人工少咗，唯有靠丈夫做多啲幫補家計，日日做多幾個鐘，佢返到屋企又要幫手照顧小朋友，攰到成個人落曬形，見到都心痛！自己頭三個月又唔識湊，BB喊我又唔知咩事，自己都徬徨到喊，如果要返埋工好辛苦！所以希望爭取14個禮拜產假。
