◀李秀恆（左二）同方力申（左三）一齊煮嘢食 /大公報記者陳才逸攝
廠商會尋日上演咗一場「俊男廚房」，由廠商會會長李秀恆大戰「小方」方力申，佢哋兩個都話自己平時「識食多過識煮。」好彩喺大廚提點下，兩人都有板有眼咁分別整出中西合璧嘅「甜醋Tiramisu」，同香氣飄逸嘅「墨魚滑雞中寶」。最後廠商會副會長戴澤良話兩邊都各有特色，決定好似獎門人咁「打和啦」。
一蚊優惠日日有
而鍾意「港飲港食」嘅你留意啦！廠商會下個星期六（28號）到11月5號會喺葵涌運動場搞「第六屆香港食品嘉年華」，今屆熟食檔大增到50個，長洲大魚蛋、蚵仔煎、韓式燒魷魚、肉夾饃等形形色色，咁多中外及港式美食都啱曬鄭晴，仲會有九架美食車每日輪流過來駐場，等大家唔使跑勻港九新界先食到美食車嘅「好東西」。另外，有參展商亦都推出一蚊「震撼價」優惠，每日限量發售60份海蜇頭，30份素漢堡扒、沙嗲牛肉脆豬包等等，仲有好多本地品牌食品同生活用品都有折扣，到時大家就可以趁機掃平價貨食好嘢，實行「荷包小出血，嘴仔大滿足」，一袋二袋咁返屋企啦！
