多個反對派日前發起以遊行為名，籌錢為實嘅「反威權遊行」，要求律政司司長袁國強下台。雖然行前講到好巴閉咁，但社會反應就非常冷淡啦，仲畀多個大專學生會杯葛。反對派雖然聲稱有四萬人參與，但警方估算就話遊行高峰期最多只係得四千幾人，香港眾志常委周庭尋日出席電台節目就繼續死撐，話佢哋並唔係濫用「13+3」打悲情牌，同大專學界亦無不和，只係大專學界、議會、政黨等「民主派」喺不同戰線上抗爭啫，不應被演繹為不團結咁話。

　　之不過，同場嘅港大學生會會長黃政鍀就好有禮貌地「打臉」，先是話感激主辦方嘅本意，但隨即又暗串對方「不合時宜」。黃政鍀話多間院校杯葛今次遊行係集體決定，因為對遊行要求袁國強落台的訴求好有保留，話袁國強唔係威權源頭，又覺得唔應淨係關注「雙學三囚」和13名東北示威者喎雲雲，不和嘅關係簡直浮哂上面。

　　至於周庭就繼續歪理連篇，話要求袁國強下台只係其中一個短期目標，日後仍然有不少「戰線」，包括「一地兩檢」、大學更換校長等議題，暗示反對派日後會發起更多抗爭。港區全國人大代表吳秋北都睇唔過眼，話呢個係荒謬嘅無稽之談，「叫反對派解釋下咩叫威權，如果維護法治嘅權威就叫威權，完全係亂講嘢，犯法就要負責任，呢個就係法治精神，反對派唔好再誤導市民啦。」