圖：有份制服去年11月機場找換店劫匪嘅（左起）陳子軒、葉兆良、香鈺棠、馮嘉恩得到「好市民獎」
香港治安咁好，除咗多得香港警察，市民嘅支持都好重要。警方尋日向四十名市民頒發「好市民獎」，包括有份制服去年11月機場找換店劫匪嘅陳子軒、馮嘉恩，香鈺棠、葉兆良，佢哋分別報警兼追去的士站截住賊人，最終賊人行劫罪成被判監五年四個月。任職中旅社嘅葉先生形容俄羅斯籍賊人「高我半個頭」，但佢一啲都唔驚。
今年「好市民獎」最年輕得獎者係14歲讀中三李柱鋒。佢今年七月喺天水圍天瑞邨親眼睇到一個賊人「打荷包」，即時通知女事主截住賊人，大叫「偷嘢」引起途人注意，一直跟住賊人直到警員到場。鋒仔仲話志願係做警察，事發後即獲邀加入少年警訊。
至於最年長得獎者75歲丁鑄生笑言，自己「愈幫愈忙」。今年六月，佢喺黃大仙遇見警察追緊一名涉嫌襲警嘅男子，諗住幫手「批㬹」截住疑犯，點知反而被推跌右手手腕骨折，仲畀個疑犯走甩咗，真係可惜。
