大公產品

首頁 > 港聞 > 正文

特首實測證高鐵好方便

時間:2017-08-31 03:15:16來源:大公網

  圖:港人可以喺熱門車站用回鄉證喺自助機買票取票

  想知搭高鐵有幾方便?特首林鄭月娥就親身為大家實測一下。林鄭尋日喺Facebook上載短片,係佢8月28日從天津搭「和諧號」高鐵到北京嘅情況,佢喺列車上介紹,天津至北京南站距離120公里,有高鐵連繫,車程只需半粒鐘,每日有98班次,大大縮短咗兩城市嘅距離,不少喺北京工作嘅港人,因此可以選擇住喺天津。列車到站時,林鄭月娥慨嘆:「真係話咁快就到。」

  「復興號」座位舒適 行駛更寧靜

  喺北京南站大堂,林鄭特別介紹高鐵嘅售票設施,因為以往港人無論喺網上訂票,抑或即場購票,都要去售票處排隊,但而家有自動售票、取票機,港人用回鄉證以實名買票、取票,「咁就方便好多喇。」佢又感謝中國鐵路總公司為港人提供便利,唔少港人出行嘅熱門車站都會增加呢嗰設施。另外,林鄭喺天津站月台參觀新嘅「復興號」高鐵列車,佢形容「復興號」外形流線型,座位舒適,車行得更寧靜。

  林鄭今日會到深圳訪問,為一個香港設計展覽開幕儀式、前海深港設計創意產業園奠基儀式主禮,亦會參觀深港青年創新創業基地、科技企業。據悉,林鄭將會同深圳市領導會面,商討兩地喺粵港澳大灣區、「一帶一路」倡議方面嘅合作,為香港尋找新經濟增長點。創新及科技局局長楊偉雄、商務及經濟發展局局長邱騰華、政制及內地事務局局長聶德權、行政長官辦公室主任陳國基都會隨行。

最新要聞

最新要聞

最受歡迎