「遼寧」號艦隊昨早抵港，警隊派出水警小艇隊開路。香港警察facebook專頁，上載咗多張從海上近距拍攝「遼寧」號嘅照片。艦隊由西面駛入香港水域時，海事處船隻帶頭迎接，水警派出咗十幾隻快速追截小艇以及分區水警輪，「前三後一」兩邊護航。鄭晴聽聞，今次護送規格較以往外國軍艦訪港高，以往外國軍艦訪港一般只有水警輪護航，今次海事處就特別派出船隻為艦隊領航。
