香港各界一直不遺餘力參與國家「一帶一路」建設，好似青協嘅「一帶一路一友情」計劃，繼之前舉辦交流團、電影欣賞等活動，尋日更推出「一帶一路」多媒體通識教材，畀教師以更生動嘅方式講解「一帶一路」，吸引到近百位教師出席研討會。
今次嘅教材主要配合通識科「全球化」、「現代中國」同「今日香港」嘅單元，分為八個課節，特點係每節課程除咗文字版詳細嘅資料、簡報等，仲有動畫短片、「圖解課題精要」，用更吸引學生嘅方式講出每堂嘅重點所在。
港區全國人大代表、教育統籌委員會主席雷添良話，政府一直推動學生多接觸「一帶一路」，感謝青協嘅項目加深學生對「一帶一路」嘅認識。青協總幹事王䓪鳴就話，香港青年應該加強認識「一帶一路」嘅機遇同挑戰，感謝優質教育基金資助佢地製作教材，希望幫助中學老師同學生有系統咁思考「一帶一路」嘅背景同意義。
