民協馮檢基想出選九龍西補選就係人都知，民協Facebook之前亦都公布咗呢個消息，不過阿基就唔記得登出，結果用咗民協官方帳號同網友互片添！同時，阿基呢個參選決定亦引起民協地震。前主席莫嘉嫻透過短訊向外公布，已經喺19號退出咗民協，上周六獲中委會通過。佢接受傳媒查詢又話，退黨係因為阿基參選同公眾期望有落差，同民情差太遠，民協仍有一班人撐阿基，佢唔能夠接受喎。
阿基咁戀棧權位，當然死撐啦！話自己係通過民協內部初選機制，亦係大多數人決定，而今次九西補選唔係民協「家事」，係整個「泛民」嘅「公事」喎！佢又補充，2020年民協一定派到新人去選立法會。
事情發展到咁，都唔知好嬲定好笑。世界潮流都係交棒畀後生，但民協違反常態，更重要係阿基輸咗兩次都唔心息。
2015年區選，阿基都可以喺自己老巢輸咗，之後舊年轉戰新西又輸。好心阿基就醒下啦！睇下呢個世界發生咩事啦！你估九西真係政壇關愛座咩？
