萬眾期待嘅「創科驅動成就夢想」科技展後日開幕！《大公報》尋日已搶先報道，展覽重頭戲之一嘅「長征一號」運載火箭，前日凌晨已連同其餘國家航天展品，經落馬洲口岸及東隧運抵維園。想率先一睹廬山真面目？民建聯主席李慧琼尋日喺社交網站上載一段短片，內裏記錄低「長征一號」嘅組裝過程。先睹為快，馬上去片！
基於保安理由，大部分展品運送期間全程被布料遮蓋，但喺呢段長達一分鐘嘅短片內，就可以清楚睇曬，幾十位工作人員點樣有序地，將長達29米嘅「長征一號」火箭，由三截組件砌番埋成為一體。
講返航天熱，其實《大公報》前排都搞咗個「我的太空夢」全港中小學生徵文比賽，吸引超過千八個學生投稿，題目唔單止有《我的太空夢》，仲有《我要上太空》、《我在太空過生日》，詩歌、散文同小說都有，足見香港青少年對太空充滿幻想同熱誠。
鄭晴再次溫馨提示各位讀者，科技展將會喺星期四（29日）至7月2日，一連四日喺維園足球場舉辦，大家千祈唔好錯過呀！
短片連結：https://www.facebook.com/LeeWaiKingStarry/videos/115904536177279/。
