經過市民半個月嘅「熱血」支持，紅十字會輸血服務中心嘅血庫存量終於回穩！鄭晴尋日喺Facebook見到，前日有1025位有心人士前往血站捐血，成功收集咗780袋血液。中心對大家嘅無私支持表示衷心感謝，又希望市民可以繼續定期捐血，保證香港嘅血液可以穩定供應。但中心發現咗一個需要注意嘅現象，喺本月6號至12號短短一周入面，就有855人因血紅素不足，而被暫緩捐血，其中超過七成都係女士。中心因此提提大家，要關注「血紅素不足」嘅問題，又貼心哋送上「烏豆黑木耳木棉魚湯」食譜，多多飲用可補充身體嘅鐵存量喔。
