圖：街坊唔捨得之餘，不忘「打卡」/大公報記者林良堅攝
以「母子檔」經營嘅西九龍中心雪糕檔「Ice Cha Cha」因不獲商場續租，尋日母親節正式結業。天下無不散之筵席，店東黃媽媽雖然唔捨得執笠，但就覺得同寶貝仔開檔經已圓夢，期望不久將來可以喺區內重新擺檔，「繼續有又大球好味雪糕食」。
「唔想媽媽辛苦」「最難忘母親節」
尋日係「Ice Cha Cha」最後一日營業，店東Calvin喺下晝兩點開檔時，向母親送上鮮花，感激媽媽多年嚟嘅照顧，仲話「凡事總有希望，最緊要開心。」最後一天只賣10桶雪糕，「唔想最後一日都要媽媽做得咁辛苦！」黃媽媽就話尋日係「最難忘嘅母親節」。
「五蚊兩球」平價雪糕店執笠，唔少街坊當然唔捨得。晏晝兩點開舖前，已有過百位顧客排隊等候，排隊市民絡繹不絕，下午三點幾就需要截龍。
食一杯雪糕，不少市民排隊超過兩小時都唔嫌辛苦，仲喺店面貼上留言字句，或送上心意卡，以鼓勵Calvin「母子檔」。
黃媽媽講笑指，節慶雖要在工作中度過，但唔嫌辛苦，指今天會同阿仔食飯補數，仲透露已有區內商場接洽，預料不久嘅將來，能再喺區內擺檔！
