圖：「男神」大名叫郭健偉（左），目前駐守海務及離島分區 網上圖片

　　消防員唔單止救人救火嘅，救貓一樣掂！話說尋日有位消防員哥哥，揸緊電單車嗰陣，喺車來車往嘅路中心見到一隻小貓咪，二話不說將電單車停埋路邊，跑去路中英勇救貓，過程仲畀途經車輛拍低，擺埋上網。有網民睇完形容呢位消防員係「暖男」，有啲仲讚佢係「男神」，鄭晴睇到都心心眼。

　　老婆大讚：我老公咁有型

　　不過，經過人肉搜查發現，「暖男」消防員已經「封盤」，剛啱喺上個月結婚，俊男美女靚爆婚照都上曬網。新婚太太尋日都喺Facebook讚老公：「點解我老公咁有型，高大威猛又有愛心」。

　　英勇救貓嘅「暖男消防員」大名叫郭健偉（Kevin），鄭晴「八」到佢喺2007年起加入消防員行列，目前駐守海務及離島分區，閒時鍾意打排球、玩水上活動，仲有係鍾意小動物囉！

　　Kevin尋日朝早八點喺Facebook發文，憶述朝早揸電單車返工時嘅救貓經歷，「發現有舊嘢喺馬路中心，回望一下，郁嘅」，原來係隻小花貓，佢話：「行咗陣點都唔忍心，泊低車返去望望，唔救佢應該會畀車車扁」。雖然當時馬路上交通好繁忙，Kevin仍然跑去勇救花貓，完美體現消防員奮不顧身拯救精神。佢其後喺Facebook交代，貓仔已轉交畀義工等待領養。

　　消防處職工總會主席聶元風同鄭晴講，救助弱小係消防員一貫責任，佢讚揚Kevin有愛心，好英勇。不少網民喺Kevin嘅Facebook留言多謝佢：「英雄，多謝你一份愛令香港變得溫暖！」