圖：候任特首林鄭月娥尋日到將軍澳單車館，幫香港嘅運動員打氣。林太喺賽後慰問Sarah，合照留影
尋日係場地單車世界錦標賽2017最後一日賽事，將軍澳嘅香港單車館氣氛，仲熱過街上嘅氣溫。候任行政長官林鄭月娥都親自去賽場，幫香港嘅運動員打氣。「牛下女車神」李慧詩（Sarah）喺最後嘅女子凱林賽雖然大熱倒灶，但喺爭先賽成功奪得銅牌，而佢嘅表現亦一早贏盡港人掌聲。
慰問李慧詩 擔心壓力大
林太喺賽後都有特登去慰問Sarah。Sarah話，林太問佢攰唔攰同有無壓力，又話好開心比賽有咁多觀眾睇，林太自己都有買飛支持，佢仲話希望Sarah繼續努力，同會留意Sarah之後有咩比賽。而Sarah都話自己有少少攰，因為已踏入比賽最後一日，但認為自己已經盡咗全力表現香港人精神，感謝大家對佢嘅支持。
其實鄭晴知道，林太一直都好支持本地體育發展，好似佢參選特首時，香港單車代表隊總教練沈金康亦有拍片支持林太，提到2006年多哈亞運會時同林太建議政府應興建一個單車館，而今日比賽嘅香港單車館，正正就係當年林太同佢傾完之後宣布興建嘅！
鄭晴
