圖：楊岳橋（左）赴台參加論壇，被網民揶揄
港台政治人物接觸愈來愈多，唔止激進「本土」及「港獨」分子到台灣博宣傳，連「泛民」議員公民黨黨魁楊岳橋都準備聽日到台灣出席傳媒論譠，同場嘅仲有被褫奪議席的青年新政梁頌恆，及台灣太陽花運動搞手林飛帆，似乎兩地政治人物嘅關係愈來愈「緊密」。
上星期，梁頌恆啱啱同游蕙禎到台灣出席「藏獨」機構主辦的活動，聽日又同公民黨議員楊岳橋一齊去台北出席「兩岸三地新領袖論壇」。
論壇係台媒《新新聞》三十周年社慶節目之一，話邀請四位30歲左右、深具「影響力」的青年「菁英」討論兩岸三地共同關切嘅問題，展望未來十年兩岸三地的互動與發展。嘉賓除咗楊岳橋、梁頌恆及林飛帆，仲有內地傳媒人賈葭。
不過，有台灣網民唔係好認同呢個「新領袖」組合，留言話：「他們是什麼咖（角色）啊，還新領袖？」
「本土派」或「港獨」分子去台灣己經行到熟，公民黨成員去台灣都唔係第一次。太陽花運動期間，公民黨議員陳淑莊曾經以所謂「佔中特派員」嘅身份去咗台灣視察，當時仲訪問過林飛帆。
港台政治人物接觸愈趨頻密，唔知會唔會令香港政治氣氛台灣化，或者將台灣議會的武鬥文化帶咗嚟香港呢？
