圖：吳俊霆（左二）昨日與黃炎華（左一）和陳國明（右二）一同出發挑戰珠峰/大公報記者徐曉彤攝

　　正所謂「又越過高山，又越過谷」，攀山專家吳俊霆（Elton）繼舊年成功登上馬納斯盧峰後，尋日又再出發挑戰世界第一高峰珠穆朗瑪峰，如果攻頂成功，Elton將會成為第四位由南坡登上珠峰嘅香港人，為港人爭光。Elton話，今年回歸20周年，希望透過登珠峰，寓意香港再創高峰，提高社會士氣，同心創前路。佢已經計劃，返港後搞分享會，目標係幫香港移植運動協會籌100萬元善款。

　　瞞住父母 留低曬啲錢

　　有8848米高嘅珠峰真係唔講得笑！Elton話，當天氣極端時，珠峰溫度可跌到零下60℃，風速達100公里，就好似打緊八號風球咁！但係佢尋日出發時，仍然信心滿滿，佢話只要天氣好，攻頂不成問題，心情輕鬆，預計六至八星期完成旅程。講就係咁講，Elton話其實到尋日出發都仲係瞞住父母，只係「留低曬啲錢」畀父母。

　　要登上極地，裝備當然唔少得。Elton介紹，珠峰大風大雪，所以今次着咗對可以抵禦零下40℃天氣、防風防雪嘅雪鞋，足足重四公斤，為咗避加行李費，佢要着住對鞋上機。另一裝備冰斧就係用嚟鑿入雪地，好似扶手咁，固定身體位置。上次登馬納斯盧峰，Elton畀人偷走咗一支冰斧，佢話今次一定攬實唔放。

　　鄭晴