圖：市民隨手拎起「重型武器」水桶進行攻擊 \大公報記者林良堅攝

　　泰國新年臨近，鄭晴尋日就喺有「小泰國」之稱嘅九龍城，親身經歷咗一年一度嘅盛事「潑水節」。晏晝啱啱過，數百人帶齊「武器裝備」，喺城南道嘅「主戰場」集結開戰。沿街嘅舖頭，不少老闆放低生意，加入「混戰」，「手無寸鐵」嘅攝影記者就成為大家「偷襲」嘅首要對象！水槍熱賣，連地產舖都「唔賣樓」一日，改賣水槍，按唔同「火力」每把售價由10蚊到50蚊不等。

　　話說正式嘅「潑水節」習俗歷時數日，當地人清早起身就沐浴禮佛，之後就開始連續幾日嘅慶祝活動，呢段時間，大家用純淨嘅清水互相潑灑，祈求洗去過去一年嘅唔順景，新嘅一年重新出發咁話。「潑水節」首兩日係去舊，最後一日就係迎新。鄭晴我就唔使去咁遠，喺「小泰國」九龍城一日內就可以送舊迎新，真係「泰」方便喇！

　　城南道嘅「Lemon Shop」老闆娘魏女士話，尋日生意同往日冇乜唔同，但節日最重要係開心，隨即拎起「重型武器」水桶，趁攝影記者同路人圍觀影相間隙，靜雞雞由背後「偷襲」，然後更直接拎起水管向路人「掃射」，隨即迎來多人「圍攻反擊」。情迷泰國文化嘅港人曾小姐就話，尋日適逢係佢生日，所以約埋朋友嚟「潑水節」慶生，雖然帶齊「裝備」，着埋雨褸，但都預咗會濕身。

　　10年前由泰國移民來港嘅陳女士，尋日同一眾朋友喺街邊隨住音樂起舞，又不停向每個路人面部撲麵粉。佢話，撲粉係泰國新年嘅傳統習俗，代表美好嘅祝願，長輩向晚輩面度撲粉，就好似中國過年長輩向晚輩派利是，都係祝福嚟㗎。