大公網3月9日訊 （記者龔學鳴報道）新民黨主席葉劉淑儀已經收拾心情，繼續服務市民。由葉太搞嘅海上絲綢之路協會將會喺四月舉辦「一帶一路」茶文化體驗之旅，到時就會暢遊東部華僑城茶溪谷、四季花田等等，仲可以體驗採茶、炒茶嘅樂趣添。葉太今日就係facebook發帖，話有傳媒關心佢到底會否出現喺呢個團，葉太首先就感謝傳媒關心，之後就諗返起五六年前，同囡囡曾經去過東部華僑城遊覽，而茶溪谷嘅「茶翁古鎮」及「三洲茶園」等遊覽區的景色卻令人驚喜。
葉太仲話，嗰度鳥語花香，翠綠山谷環繞四周，仿如置身武俠小說《神鵰俠侶》中嘅絕情谷，加上遊覽當日天朗氣清，美景配上藍天白雲，佢同囡囡都被深深吸引，流連忘返。
咁到底葉太會唔會出現呢?「我正查看日程，假如時間許可，都想重遊這個人間仙境……如能與大家一起品茶遊谷，的確是一件賞心樂事。」假如葉太真係出現，相信唔少支持者都會好開心嘅。
